Қазақстан нарығында Яндекс-тен басқа тағы 7 интернет-сервис бар

Депутат Мұрат Әбенов жолаушылар тасымалын бақылайтын өзін-өзі реттейтін ұйымдар құру мәселесіне арналған жалпы отырыста елдегі такси компанияларының барлығы «Яндекс.Таксиге» бағынатынын айтты.

Бұл ретте депутат такси нарығында әділ бәсекелестік болуы үшін ұсынылып отырған өзін-өзі реттеу мен ақпараттың ашықтығы қажет екенін алға тартып отыр. 

Яндекс.Таксидің нарықтағы ең негізгі ойыншы екенін бәріміз білеміз. Яндекс.Карта арқылы басқа ешқандай платформа іске қосыла алмайды. Америкалық Uber нарыққа кірді, қуып шықты, қытайлық компаниялар да кіруге тырысты, оларды да қуып шықты. Соңында тек Яндекс қалды. Ал осы Яндекстің өзі өзін-өзі реттеу ұйымына кірмейді, – деді Мұрат Әбенов.

Мәжілісмен «Яндекс.Таксидің» қазір әкімдіктерге жолаушылар ағыны, қанша көлік жұмыс істейтіні және олардың қандай тіркеуі бар екендігі туралы ақпарат бермейтінін атап өтті. Оның айтуынша, егер «Яндекс.Такси» агрегаторының өзін-өзі реттейтін ұйымға қосылуы талап етілмесе, онда атқарылған әрекеттерден нарықта ешқандай нәтиже болмайды.

Ертең біреулер тағы да Яндекске қарсы шығуы мүмкін. Таксопарктер тек Яндекстің айтқанын істейді. Олар қазірдің өзінде бізді қорқытып отыр. «Егер бізге қатты қысым жасасаңыз, қызметті өшіріп тастаймыз, халық шулайды» дейді.  Біз не істей аламыз? Қандай шешім қабылдануы мүмкін? – деді Мұрат Әбенов. 

Ал Көлік министрі Марат Қарабаев заң мұндай агрегаторлардың өзін-өзі реттейтін ұйымға міндетті түрде енгізілетінін атап өтті. 

Олар ұйымға қосылуға міндеттеледі. Бекітілетін ережелер мен стандарттар аясында олар толық ақпаратты, соның ішінде ұйым мүшесі саналатын қарапайым жүргізушілердің деректерін де ұсынуы керек, - деді министр.

Оның айтуынша, қазір Қазақстан нарығында Яндекс-тен басқа тағы 7 интернет-сервис бар. Еуропадан тағы бір әлемдік такси брендін Қазақстан нарығына әкелу жоспарланған. Алайда Марат Қарабаев ол компанияның атын атаудан бас тартты.

Еске сала кетсек, бұған дейін «Яндекс.Таксидің» бағасы неге қымбат екенін жазған болатынбыз.