Дәулет Тұрлыханов пен Роза Рымбаеваны алдаған кәсіпкер сотталды
коллаж: Ulysmedia 
Өзі кінәларының ешқайсысын мойындаған жоқ
Депутат Дәулет Тұрлыханов пен әнші Роза Рымбаеваны арбауына түсірген 63 жастағы кәсіпкер Серік Бекқайыров 6 жыл 8 айға бас бостандығынан айырылды.
Іс материалдарына сәйкес, 2013 жылдың жазында Бекқайыров өзінің танысы Тұрлыхановқа келіп, асфальт-бетон зауытын салу үшін 1,2 миллион доллар сұраған. Оның орнына зауытқа үлескер болуды ұсынған. Ал Тұрлыханов келісіп, оған ақша берген.
Сотта айыпталушы Дәулет Тұрлыхановты 1989 жылдан бері көрші болғандықтан танитынын, бірақ одан ақша алмағанын айтты. Ол соттан депутаттың куәліктеріне сын көзбен қарауды сұрап, қазір ешкім 1,2 миллион долларды кепілсіз қарызға бермейтінін атап өтті.
Тергеу изоляторында жатқанда тергеуші мен Тұрлыхановтың адамдары келіп, 2 миллион доллар талап етіп, қорқытқан. Бұл эпизод бойынша айып тағылған. Тұрлыханов тарапынан әлі күнге дейін қоқан-лоққы жасалып жатыр, – дейді Серік Бекқайыров.
Айтуынша, ол Роза Рымбаеваны да алдамаған. 2017 жылы шынымен Алматыдан Рымбаеваның пәтерін 400 мың долларға сатып алған. Алайда барлық сомасы болмағандықтан, олар 3 жылға ресми қарыз келісімшартын жасасқан, оны нотариус бекіткен. Осы уақыт ішінде ол тек 205 мың доллар төлеп үлгерген. Қалған соманы уақытында төлей алмаған. Себебі 2020 жылы пандемия басталып, оның бизнесі тоқтап қалған. Қазір пәтердің жағдайы белгісіз. Алайда тергеу барысында Бекқайыровтың жылжымайтын мүлікті қайта сатып, ақшасын жұмсап жібергені мәлім болды.
Үшінші жәбірленушіге 2019 жылы ол 70 мың долларға Энергетика министрі арқылы электр энергиясын тиімді бағамен сатып алу мәселесін шешуге уәде берген. Ал төртінші жәбірленушіден 2020 жылы автокөлік сатып алып, бірақ 75 мың долларды кейінірек төлеуге уәде берген. Осы эпизодтар бойынша да ол кінәсін мойындамады.
Сот оның дәлелдерін қабылдамай, айыптау үкімін шығарды. Сотталған адам Дәулет Тұрлыхановқа 533 748 000 теңге, Роза Рымбаеваға 91 181 950 теңге төлеуге, сондай-ақ екі басқа жәбірленушіге 31-33 миллион теңге көлемінде шығынды өтеуге міндетті болды.
