Жұманғарин қытай іскер топтарына қант зауыттарын салуға инвестиция құюды ұсынды
primeminister.kz 
2005 жылдан бастап Қытайдан тартылған инвестиция көлемі 25 млрд долларға жуықтаған
Премьер-министрдің орынбасары Серік Жұманғарин Қытай коммунистік партиясы Орталық комитетінің (ҚКП ОК) Бірыңғай фронт жұмыс бөлімі министрінің орынбасары және Бүкілқытайлық өнеркәсіп және сауда федерациясы төрағасының бірінші орынбасары Шэнь Инмен кездесті, деп хабарлады Үкіметтің баспасөз қызметі.
Серік Жұманғарин қытай іскер топтарына Қазақстанда қант зауыттарын салуға инвестиция құюды ұсынды. Сонымен қатар ол астықты терең өңдеу кәсіпорындарының санын арттыруға қызығушылық бар екенін атап өтті. Айтуынша, Қазақстан ұқсас және басқа да инфрақұрылымдық жобаларды іске асыруға барынша қолдау көрсетуге дайын.
Қытай Қазақстанның экономикасына инвестиция салатын топ-5 елдің қатарына кіреді. Былтыр Қазақстан мен Қытай арасындағы тауар айналымы 30% өсіп, рекордтық 41 млрд долларға жетті. Биыл бірінші жартыжылдықтың қорытындысы бойынша, тауар айналымы шамамен 20% өсті, - деп мәлімдеді вице-премьер.
Айта кетсек, 2005 жылдан бастап Қытайдан Қазақстанға тартылған жалпы инвестиция көлемі 25 млрд долларға жуықтаған. Тек былтыр тікелей қытайлық инвестициялар көлемі 15% өсіп, 1,6 млрд доллардан асты.
Бүгінде елімізде қытай капиталының қатысуымен 30 мыңға жуық бірлескен компания табысты жұмыс істеп жатыр. Олардың шамамен төрттен бірі соңғы жылы ғана қосылды. Бұл қытай іскер топтарының Қазақстандағы бизнес-климатқа жоғары сенім білдіретінін және біздің серіктестігіміздің тұрақтылығы мен өнімділігін дәлелдейді, - деп атап өтті Серік Жұманғарин.
