2029 жылы орташа жалақы жарты миллион теңгеден асады - Үкімет болжамы
bai-bol.kz 
Ол кезде халық саны 21,3 миллион адамға жетуі мүмкін
Қазақстандықтардың орташа айлық жалақысы 2029 жылы 573 мың теңгеден асады. Бұл туралы Қазақстанның 2025-2029 жылдарға арналған әлеуметтік-экономикалық даму болжамында айтылған.
Үкімет Қазақстандағы бір қызметкердің орташа айлық жалақысы мынадай болады дейді:
- 2024 жылы – 396 мың теңге;
- 2025 жылы – 431,6 мың теңге (+8,9%);
- 2026 жылы – 466,9 мың теңге (+8,1%);
- 2027 жылы – 500,7 мың теңге (+7,2%);
- 2028 жылы – 536,3 мың теңге (+7,1%);
- 2029 жылы – 573,7 мың теңге (+6,9%).
Ұлттық статистика бюросының мәліметінше, 2024 жылдың бірінші тоқсанында орташа айлық жалақы 382,2 мың теңге болды. Ол Қазақстандағы барлық жұмысшы жалақысының орташа арифметикалық мәні ретінде есептеледі.
Үкіметтің болжамы бойынша, 2025-2029 жылдар аралығындағы ең төменгі жалақы қазіргідей 85 мың теңге болып қалады. Өмір сүру минимумы 2025 жылы 46,2 мың теңгеге, ал 2029 жылы 56,4 мың теңгеге дейін өседі. Табысы ең төменгі күнкөріс деңгейінен төмен халықтың үлесі осы жылдар ішінде 5,3%-дан 5%-ға төмендейді.
2025 жылы ең төменгі зейнетақы мөлшері жыл сайын шамамен 5 мың теңгеге өсіп, 62,7 мың теңге болуы мүмкін. Нәтижесінде 2029 жылы ең төменгі зейнетақы мөлшері 82,6 мың теңге болады деген болжам бар.
Ең төменгі есептік көрсеткіш 2025 жылғы 3,9 мың теңгеден 2029 жылға қарай 4,8 мыңға дейін өседі деп болжанды. Осы жылдардағы жұмыссыздық деңгейі 4,7% болады-мыс.
Қазақстан халқының саны 2029 жылға қарай 21,3 миллион адамға жетуі мүмкін. Оның ішінде жұмыспен қамтылған халық саны – 9,4 миллион адам. Осы уақытқа дейін өмір сүру ұзақтығы 77 жасқа дейін артады.
