Тапаншамен тонау жасамақ болған жігітті ұстаған студентке ломбард иесі телефон сыйлады
ашық дереккөз 
Оны сатып, оқуымның ақшасын төледім, - дейді Ұлықбек Ахметов
Шымкентте ломбардқа қарумен кіріп келген белгісіз ер адамды полицияға ұстап берген 18 жастағы Ұлықбек Ахметов қылмыстың алдын алды.
Бұл ретте 1-курс студенті ломбардқа ұялы телефонын өткізіп, оқу ақысын төлегісі келген. Айтуынша, ол ломбардта тұрғанда өзінен кейін бетін тұмшалаған тағы бір ер адам кіріп келген. Алдымен ломбард қызметкерінен кеңес сұраған белгісіз адам біраздан соң қалтасынан қару алып шыққан.
Менің ұялы телефонымды қабылдау процесі аяқталар кезде маскадағы жігіт қалтасынан қару шығарды. Мен оны пранк деп түсіндім. Сөйтіп, досыма қарап күлдім. Қалжың деп қабылдап, өзінен де сұрадым. Ол әзілдеп тұрмағанын, кассадағы қыздардан ақша талап ететінін айтты. Сол кезде мұрнынан ұрдым. Қанша рет жұдырықтағаным есімде жоқ. Тек жерге құлап, қаруы ұшып кеткенде тоқтаттым, - дейді Ұлықбек Ахметов.
Студенттің ломбард қызметкерлерін құтқарған сәті түсірілген видеоны Шымкент полициясы Instagram-ға жариялады. Ал 1-курс студенті оқиғаның шынайылығына полиция келгенде бір-ақ сенген. Айтуынша, тонаушы да оқу ақысын төлей алмай жүрген өзі қатарлы студент болып шыққан.
Бірден полиция мен сол жердің күзеті келді. Сөйтіп, олар бізді бөлімшеге алып кетті. Жағдайдың растығына қолымнан саусақ іздерін алғанда бір-ақ сендім. Кейін ломбард иесі маған қымбат ұялы телефон сыйлады. Оны сатып, оқуымның ақшасын төледім, - дейді Ұлықбек Ахметов.
Айта кетсек, ол 4 жыл бойы боксқа қатысып, түрлі байқауда жеңімпаз болған. Ал қазір дене шынықтыру пәнінің мұғалімі мамандығында оқып жатыр екен.
