Кез келген несиені онлайн алу үшін биометриялық деректерді тапсыру шарт
depositphotos.com 
Бұл несие ресімделген жағдайда, азаматтарды қосымша қорғауға мүмкіндік береді
Қазақстандықтар енді микроқаржы ұйымдарынан несие алу кезінде биометриялық деректерін тапсыруға міндеттеледі.
Қаржы нарығын реттеу және дамыту агенттігі екінші деңгейлі банктер мен микроқаржы ұйымдарын (МҚҰ) несие беру кезінде толық биометриялық сәйкестендіру жүргізуге міндеттейтін қаулы қабылдады. Онда биометриялық деректерді пайдалану және қорғау қағидаттары, бет бейнесі бойынша биометриялық идентификаттау өткізу тәртібі, идентификаттау деректерін алу және бейненің дұрыстығын тексеру рәсімдері, идентификаттау деректерін беру кезінде байланыс арналарын шифрлауды қамтамасыз ету бойынша талаптар, сондай-ақ биометриялық идентификаттаудың бүкіл процесін құжаттау тәртібі белгіленеді, – делінген агенттік хабарламасында.
Жаңа ереже банктер мен микроқаржы ұйымдары интернет арқылы онлайн несиелер мен микронесиелер берген кезде қолданылады.
Бұл нормалар қаржы ұйымдарын халыққа несие беру кезінде, оның ішінде фотосуреттерді немесе алдын ала жазылған бейнероликтерді пайдаланудан қорғай отырып, толыққанды биометриялық идентификаттау өткізуге міндеттейді. Биометриялық идентификаттау өткізу нәтижелері ресми түрде құжатталады. Бұл оларға несие ресімделген жағдайда, азаматтарды қосымша қорғауға мүмкіндік береді, – делінген хабарламада.
