Кезінде тізем батқан, ақысына кірген адамдардан кешірім сұраймын – Қайрат Сатыбалды (ВИДЕО)
zonakz.net 
Заңсыз шығарылған активтерді қайтару – елдің ырысын өзіне қайтару, - дейді ол
Экс-президент Нұрсұлтан Назарбаевтың немере інісі Қайрат Сатыбалды кінәсін мойындап, істеген ісіне өкініш білдіріп, видеоүндеу жасады. Оқырман назарына оның сол сәтте айтқан сөзін қаз-қалпында ұсынуды жөн көрдік.
Халқымызда сөз бар, «Жаңылмайтын жақ, сүрінбейтін тұяқ болмайды» деген. Мен жасаған қателіктерімді мойындаймын. Маған қатысты қылмыстық іс бойынша органдарға көмектесіп, бүкіл заңсыз қаржыны қайтарып жатырмын.
Елден заңсыз шығарылған активтерді қайтару – елдің ырысын өзіне қайтару деп білемін. Бұл – мемлекет басшысы қабылдаған маңызды шешімдердің бірі. Мұндайды көрген соң, ендігі жерде ешкім елдің ырысын сыртқа шашпайды. Мемлекетімізде соңғы жылдары болып жатқан оң өзгерістерді көріп-біліп отырмын. Осындайда бәріміз бір жағадан бас, бір жеңнен қол шығарып, бірге жұмыс істеуіміз керек.
Мен президентіміздің жүргізіп отырған саясатын толықтай қолдаймын.
Заңсыз капиталдың бәрі – тиынына дейін елге қайтарылып, заң мен тәртіп болуға тиіс.
Халықтан, кезінде тізем батқан, ақысына кірген адамдардан және мемлекет басшысынан кешірім сұраймын.
Осыған дейін барлық істеген іс-әрекеттерімді саралауға, ой қорытуға уақыт жеткілікті болды. Жіберген қателігімді және кінәмді толықтай мойындай отырып, істеген ісіме өкінемін. Тергеу орындарымен бірлесіп жұмыс жүргізілді. Заңсыз жолмен иемденген активтерді толықтай қайтару қажет болды. Оның барлығы қайтарылып та жатыр.
Мемлекет басшысының заңсыз активтерді мемлекетке қайтару ісі бойынша жүргізіп жатқан саясатын толықтай қолдаймын. Менің істеген ісім басқаларға дұрыс шешім шығару үшін сабақ болады деп ойлаймын. Ағаттық істеп, ренжіткен адамдардан кешірім сұраймын, - деп ағынан жарылды Қайрат Сатыбалды.
