Тамызда елімізге ресейлік астықты кіргізуге тыйым салынбақ
tripoli.land 
Мұндағы негізгі мақсат – отандық өнім өндірушілерді қолдау
Агроөнеркәсіп кешені бойынша ведомствоаралық комиссияның кезекті отырысында ресейлік астық импортын шектеу мәселесі қаралды.
Комиссия уақытша шектеуді 6 айға енгізуге шешім қабылдады.
Ведомствоаралық комиссияның бүгінгі отырысында сыртқы экономикалық саясат мәселелері қаралды. Соның нәтижесінде Қазақстан Республикасына астықты кіргізуге 6 айға тыйым салу туралы шешім қабылданды. Бұл шектеу комиссия хаттамасы рәсімделгеннен кейін күшіне енеді. Одан кейін Ауыл шаруашылығы министрлігі тиісті бұйрықты шығаруы қажет. Шектеу шамамен 2024 жылы тамыз айында енгізіледі деген жоспар бар, - дейді астық одағының өкілі.
Оның айтуынша, шектеу енгізудің негізгі мақсаты – отандық өнім өндірушілерді қолдау. Сонда арзан ресейлік астық қазақстандық бидайды ішкі және сыртқы нарықта сатуға кедергі жасамайды.
Бұдан бөлек, комиссия отырысында экспортқа баж салығын енгізу мәселесі де қаралды.
50% көлемінде баж салығын енгізу жоспарланып отыр. Соның салдарынан қазақстандық астықтың эскпорттық бағасы көтеріліп, Қазақстан дәстүрлі нарықтардан айырылуы мүмкін. Биыл бидайдың рекордтық көлемі жиналады деген болжам бар. Ендігі мәселе – оны қайда сатамыз? Пәкістанда жақсы астық жиналады дейді. Соның нәтижесінде Ауғанстанға жіберетін астығымыз азайып қалуы мүмкін, - деп атап көрсетті сала маманы.
Айта кетсек, бұған дейін Қазақстанда ресейлік астықты әкелуге тек ұн тартушылар мен құс өсірушілерге рұқсат берілген. Ал толық шектеу енгізілсе, олар да көрші елдің өнімін ала алмайды.
