6 млн текше метрі жанып кеткен: Абай облысында өртенген ағаш өңделеді
vsegda-pomnim.com 
Жалын шарпыған орман ағаштарының 80 пайызы – отындық ағаш
Абай облысында өртенген ағашты өңдейтін зауыт салынады. Бұл туралы Экология және табиғи ресурстар министрі Ерлан Нысанбаев айтты.
Ведомство басшысы алдымен өңірде болған орман өртінің салдарын жою бойынша қандай жұмыстар атқарылғанына тоқталды.
Біріншіден, министрлік жедел штаб құрды. Оның құрамына Орман шаруашылығы және жануарлар дүниесі аумақтық инспекцияның өкілдері, «Семей орманы» резерватының мамандары, Абай облысының әкімдігі мен құқық қорғау органдарының өкілдері кірді. Екіншіден, тиісті жол картасы бекітілді. Өрт шалған екпелерге қатысты орман мамандары жүргізген зерттеулердің нәтижесі бойынша ағаш зиянкестері мен аурулары байқалған. Осыған байланысты орман зиянкестерінің таралуына жол бермеу және ағашты сақтау үшін бүлінген сүректі жинап алуды барынша қысқа мерзімде іске асыру қажет, - деді Ерлан Нысанбаев.
Алдын ала деректер бойынша, Абай облысында ормандағы өрттен шамамен 6 млн текше метр ағаш жанып кеткен. Резерватта бар техника мен жабдықтар, адам күші осындай көлемдегі жұмысты істеуге есептелмеген. Сондықтан арнайы техника мен жабдықтарды сатып алу керек.
Өртенген орман ағаштарының жалпы көлемінің шамамен 80 пайызы – отындық ағаш. Сондықтан бұл аймақта ағашты тереңдетіп өңдеу зауытын салу керек. Бұл ретте, министрлік Абай облысының әкімдігімен бірлесіп, орман өртінен бүлінген сүректі тереңдетіп өңдеу зауытын салу үшін инвесторлар тарту мәселесін пысықтап жатыр. Қазір 4 компания осыған мүдделі, - деді министр.
