Назарбаевтың қызына тиесілі компания тендерден ұтқан 40,3 млрд теңгені игермеген
almaty-cgkb.kz 
Тіпті, ол 80-нен аса сот тергеп-тексеруіне қатысқан
Экс-президенттің інісі, марқұм Болат Назарбаевтың қызы Ақбота Назарбаева шекара заставаларын салатын компанияны басқарып, ірі тендер алған. Бұл туралы Мәжіліс депутаты Айдос Сарым айтты.
Қазақстанның аумақтық қауіпсіздігін қамтамасыз ету үшін 50 шекара заставасын салу жоспарланған. 2022 жылы 20 шекара заставасын салу бойынша тендер жарияланды. Нәтижесінде 53 млрд 894 млн теңге сомасына мердігерлік ұйымдар – Kapital construction ЖШС және TOLAGAI-2050 ЖШС-мен жалпы шарттар жасалды. Оған сәйкес, TOLAGAI-2050 компаниясы 40 млрд 350 млн теңге сомасындағы 15 шекара заставасын салуға тиіс еді. Жұмысты орындау мерзімі 2023 жылдың 31 желтоқсанына дейін болған. Алайда жоғарыда көрсетілген шарт бойынша мерзім өрескел бұзылды, - деді Айдос Сарым.
Сонымен қатар жүргізілетін жұмыстардың сапасына шағымдар түскен.
Қолда бар ақпарат бойынша, TOLAGAI-2050 ЖШС биыл 1 қазанда тек 13 млрд 960 млн теңгені игерді. Бұл – шарттың жалпы сомасының 35%-ы игерілді деген сөз. Осы объектілер бойынша TOLAGAI-2050 компаниясы шартты орындау мерзімін тағы 9 айға ұзартуды сұрайды. Бұл жобаның айтарлықтай қымбаттауына алып келуі мүмкін, - деді депутат.
Әрине, бұл ретте аталған компанияның өз жұмысын тиісті деңгейде атқара алмай отырғаны байқалады.
TOLAGAI-2050 ЖШС Алматы қаласы мен Павлодар облысындағы суару желілерін реконструкциялау, Сайрам су қоймасындағы механикалық тазарту және тағы басқа жобалар бойынша жаңалықтарда бірнеше рет сынға ұшыраған компания болып көрсетілді. Компания 80-нен аса азаматтық және әкімшілік сот тергеп-тексеруіне қатысты. Оның 10-нан астамы 2023 жылы өтті. Оның ішінде мемлекеттік сатып алу рәсімінде міндетін адал орындамаушы деп танылды.
Көлік министрлігінің Автомобиль жолдары комитеті осы жобаның тапсырыс берушісі бола отырып, оған толық заңды негіздері болса да осы күнге дейін шартты бұзу жөнінде шешім қабылдамаған. 2022 жылғы 3 ақпанға дейін осы компанияның құрылтайшылар тізімінде марқұм Болат Назарбаевтың қызы Ақбота Назарбаева болған», - деді депутат.
Сондай-ақ ол шекара заставаларын салу Қазақстанның аумақтық қорғанысын қамтамасыз ету үшін маңызды екенін атап өтті.
Құрылыс мерзімдерінің бұзылуы елдің аумақтық тұтастығын бұзу, есірткі тасымалы мен басқа да тыйым салынған өнімдердің заңсыз айналымы, жеке тұлғалардың Қазақстан аумағына заңсыз көшіп-қону қаупінің артуына алып келуі мүмкін, - деп түйіндеді сөзін Айдос Сарым.
