Ең жоғары жалақыны ұшқыштар (орта есеппен 1 млн теңгеден бастап) сұрады

Биылғы маусымда Enbek.kz электронды еңбек биржасына тәрбиешінің көмекшісінен бастап, Аэробус командиріне дейін 94,4 мың бос жұмыс орны орналастырылды. Біліктілігі мен жұмысының қиындығына байланысты әртүрлі жалақы ұсынылған.

Мамыр айымен салыстырғанда, бос жұмыс орындарының саны 8,6 мыңға өсіп, ал түйіндеменің саны, керісінше, 9,6 мыңға азайған.

Еңбек және халықты әлеуметтік қорғау министрлігінің хабарлауынша, жазда фермерлерге, ауыл шаруашылығы, өнеркәсіп, құрылыс және көлік жұмысшыларына сұраныс төмендеген. Бұл ретте орташа біліктілігі бар қызметкерлер (32,8 мың бос жұмыс орны немесе 37%) аса сұранысқа ие.

Сонымен қатар, маусым айында білім беру қызметкерлерін дәстүрлі іздеу басталады. Бүгінде қосымша 18,4 мың педагог пен тәрбиеші қажет. Қызмет көрсету (16,4 мың бос жұмыс орны), денсаулық сақтау (8,9 мың бос жұмыс орны) және құрылыс (8,5 мың бос жұмыс орны) саласында персонал жетіспейді.

Өңірлер бойынша қажеттілікке келетін болсақ, Атырау (7 мың бос жұмыс орны), Жамбыл (6,7 мың бос жұмыс орны) облыстарына, Астанаға (6,7 мың) және Алматыға (6,2 мың бос жұмыс орны) ең көп жұмыс күші қажет.

Маусым айында білікті мамандар арасында ең танымал мамандықтар автокөлік жүргізушілері (1,7 мың бос жұмыс орны), медбикелер (1,6 мың бос жұмыс орны) және тәрбиешілер (1,5 мың бос жұмыс орны) болды. Бұл ретте PR-менеджерлерге (+1,2 мың бос жұмыс орны), іс жүргізушілерге (+948 бос жұмыс орны) және автоматтандыру инженерлеріне (+235 бос жұмыс орны) сұраныс артқан.

Жалақы мәселесіне келетін болсақ, маусым айында жұмыс берушілер ең көп төлемді бас құрылысшыларға (орта есеппен 662 мың теңгеден бастап), үңгілеушілерге (612 мың теңгеден бастап), сондай-ақ IT-қосымшаларды әзірлеушілерге (563 мың теңгеден бастап) ұсынды.

Ізденушілер тарапынан ең жоғары қажетті жалақыны ұшқыштар (орта есеппен 1 млн теңгеден бастап), кеме капитандары (933 мың теңгеден бастап) және коммерциялық кәсіпорындардың құрылымдық бөлімшелерінің басшылары (920 мың теңгеден бастап) сұрады.

Ең төменгі жалақы:

• аумақты тазалаушылар – 85 мың теңгеден бастап;
• даяшы – 85 мың теңгеден бастап;
• көліктегі қызметшілер – 85 мың теңгеден бастап;
• мұрағатшы – 85 мың теңгеден бастап;
• қосалқы жұмысшылар – 90 мың теңгеден бастап;
• хатшылар – 90 мың теңгеден бастап;
• бухгалтердің көмекшілері – 90 мың теңгеден бастап;
• фельдшерлер – 140 мың теңгеден бастап;
• контроллер – 150 мың теңгеден бастап;
• тігіншілер – 150 мың теңгеден бастап.

Жалпы, электронды еңбек биржасында ұсынылатын орташа жалақы шамамен 250 мың теңгені қамтиды.

Көптеген санатқа жұмыс берушілер көбірек төлеуге дайын. Салыстырмалы түрде жоғары жалақы (құрылысшылардан, кеншілерден және IT-мамандардан басқа) ұсынылады:

• кардиолог-дәрігерлерге – 500 мың теңгеден бастап;
• өндіруші өнеркәсіптегі бас инженерлерге – 500 мың теңгеден бастап;
• автогрейдер машинистеріне – 500 мың теңгеден бастап;
• анестезиолог-дәрігерлерге – 490 мың теңгеден бастап;
• акушерлерге – 490 мың теңгеден бастап;
• хирургтерге – 520 мың теңгеден бастап;
• жетекші инженер-электриктерге – 500 мың теңгеден бастап;
• электр газбен дәнекерлеушілерге – 510 мың теңгеден бастап;
• заңгерлерге – 500 мың теңгеден бастап.