Құрбан айт қарсаңындағы сұрақ: Жабайы қабанның етін жеуге бола ма?
pofoto.club 
Арам етті жеп қойған адам дереу тәубесіне түсіп, бір жақсылық жасайтын болса, күнәсі жеңілдей түседі
Мұсылмандар үшін шошқаның еті арам саналады. Ал жабайы қабанның етін жеуге бола ма? Егер байқаусызда шошқа етін жеп қойса, не істеу керек? Бұл сұрақтарға дінтанушы, имам Нұрлан қажы Байжігітұлы жауап берді.
Қабанды жабайы болғаны үшін жей беруге болмайды. Себебі шошқаның да, қабанның да түбі – бір. Екеуі де біздің асыл дінімізде арам саналады, екеуінің де етін жеуге рұқсат жоқ. Ал егер байқаусызда шошқаның немесе қабанның етін жеп қойса, Алладан кешірім сұрап, тәубеге келу қажет. Тоқтаусыз кешірім сұрайтын болса, мейірімі шексіз Алла бәрін де кешіреді», - дейді имам.
Сондай-ақ ол арам етті жеп қойған адам дереу тәубесіне түсіп, бір жақсылық жасайтын болса, күнәсі жеңілдей түсетінін еске салды.
Бұл – әлеуметтік желіде танылған «хит имамның» салмақты, салиқалы берген жауабы. Ал сөз соңын өзінің сол желілердің бірінде отырып берген кезекті жауабымен түйіндесек, «Дикий қабан, не дикий қабан, башбармак жеп, кола ішетін қабан болсын, бәрі харам, жәнім!».
