Сирия көтерілісшілері Башар Асадтың 40 шақты қымбат көлігін көрсетті (ВИДЕО)
коллаж: Анастасия Кеда, 66.RU 
Ондағы Ferrari F50 автокөлігінің өзі-ақ нарықта 3 млн доллар тұрады
Әлеуметтік желілерге Сирияның биліктен тайдырылған президенті Башар Асадтың Дамаскідегі сарайына жақын маңдағы гаражында түсірілген видеолар тарады. Онда аса қымбат тұратын 40 шақты автокөлік болған.
Сирия астанасының батысындағы Әл-Маззех ауданының солтүстігінде орналасқан гаражда қызыл түсті Ferrari F50 автокөлігі де бар. Оның нарықтағы құны – 3 млн доллар. Бұдан бөлек, онда Rolls Royce және Bentley көліктері болған. Автокөліктердің біріне Дамаскі нөмірі тағылған.
Осының алдында Сирияның бұрынғы президенті Башар Асадтың Дамаскідегі зәулім сарайы қалай тоналғаны туралы видеолар тараған болатын.
Қарулы оппозиция екі аптадан аз уақыттың ішінде астанаға кіріп үлгергендіктен, Башар Асад бар мүлкін тастап, Мәскеуге қашуға мәжбүр болды. Ресей оған саяси баспана берді.
