Шымкент тұрғыны асыл тұқымды тауықтардан айына 2000-2500 жұмыртқа алады (ВИДЕО)

Биыл Шымкент қаласында 428 азамат мемлекеттен қайтарымсыз грант алған. 1,5 миллионға жуық қаржы иесі атанғандар көбіне тігін цехын, кондитерлік, cұлулық салондарын ашқан. Дегенмен грант иелерінің арасында ақшаны мақсатсыз жұмсағандар да бар, деп жазды Otyrar.kz.

Динара Мэлсқызы құс шаруашылығымен айналысады. Шетелдерден асыл тұқымды тауықтар әкеліп, тұқымын көбейтіп сатады. Арнайы аппарат арқылы ай сайын 2000-2500 дана жұмыртқа шығарады. Бала кезінен қызыққан кәсіп түрімен білек сыбана айналысу үшін мемлекеттік грант конкурсына қатысып, 1,5 миллион теңгеге жуық қаржы алған.

Бұл асыл тұқымды тауықтар 2,5 келіден 7 келіге дейін ет береді. Олар арнайы дайындалған жеммен қоректенеді. Бірақ ебін тапса, пайдасы да көл-көсір дейді кәсіпкер. Ал тауықтар жұмыртқалаған соң оларды арнайы аппаратқа салады.

Биыл Шымкентте қайтарымсыз грант алып, бизнесін бастауға 3 500-ге жуық азамат өтінім беріпті. Олардың көбінің тігін цехын, кондитерлік өнім дүкендерін, сұлулық салондарын ашуға қызығушылығы жоғары дейді мамандар.

Қайтарымсыз грант иесі атанғандар әр 3 ай сайын есеп тапсырады. Сондай-ақ олардың жұмысын арнайы құрылған мониторинг тобы тексеріп отырады. Мәселен, осындай тексерулер нәтижесінде былтыр грант алған 452 адамның 138-інің қаржысын мақсатсыз жұмсағаны анықталған. Сот арқылы олардың ақшасы қайтарылып жатыр. Ал биыл 36 адамның грант ақшасын мақсатсыз жұмсағаны белгілі болды.