Неймар көліктерді үйге дейін кіргізетін лифтісі бар пентхаус сатып алды
Ол ПСЖ-ға ауысқанда тарихтағы ең қымбат футболшы атанған
Әйгілі бразилиялық футболшы Неймар Дубайдан (БАӘ) 54,45 миллион доллар тұратын пентхаус сатып алды.
Mansion Global порталының мәліметінше, Bugatti Residences кешенінен 200 миллион дирхамға (54,45 миллион доллар) сатып алған пентхаустың ішінде көліктерді үйге дейін кіргізуге мүмкіндік беретін лифт және Дубай орталығына қараған жекеменшік бассейн бар.
Айта кетсек, қазанда Неймардың Майамиден (АҚШ) 26 миллион долларға жер телімін сатып алғаны белгілі болған еді.
Жалпы, бұл 32 жастағы футболшы «Сантос», «Барселона», «Пари Сен-Жермен» және Бразилия құрамасындағы ойындарымен танымал болған. Ал 2023 жылдан бері Сауд Арабиясының «Әль-Хиляль» командасында ойнап жүр. «Барселона» сапында Чемпиондар лигасы мен Испания чемпионатын жеңіп алды. 2017 жылы ПСЖ-ға ауысып, тарихтағы ең қымбат футболшы атанды.
Еске сала кетсек, Неймар «Семей» футзал командасына видео жолдап, жаңа маусымға сәттілік тілеген болатын. Сондай-ақ ол қазақстандық теннисші Елена Рыбакинамен кездескен еді.