Келесі жылы онлайн шағын несие алудың шарттары күшейеді

2025 жылдан бастап елімізде онлайн шағын несие рәсімдеу шарттары күшейтіледі. Енді несие алушыдан биометриялық тексеріс пен электронды цифрлық қолтаңба талап етіледі. Сондай-ақ құпия сөзді енгізу жүйесі де қатаңдатылмақ. 

Қазір халықтың артық қаражаты банктегі есепшотта. Соңғы жылдары сол қаржыны көздеген алаяқтар иемденіп кетіп жатыр. Оған қоса, несие алдырып, тұрғындарды сан соқтырған жағдайлар аз емес. Сол себепті Мәжіліс депутаттары онлайн несие беру тәртібін қарастыруды бір емес, бірнеше рет көтерді.

Енді тұтынушы үш факторлы тексеруден өтеді. Банктер төлемдер мен аударымдарды іске асыруда клиенттің мобильді нөміріне тексеру кодын жібереді.

Сондай-ақ онлайн несие алуда «шешімді өзгерту» кезеңі де қарастырылады. Бұл тұтынушыға қажет жағдайда өз келісімінен бас тартуға мүмкіндік береді. Яғни, несие алушы өз атынан қаржы иемденген алаяқтардың қарызын да жоя алады.

Қысқасы, несие алудың талаптарын қиындату – халық игілігі үшін жасалып жатқан әрекет. Бұл азаматтардың ақпараттық қауіпсіздігін қамтамасыз етеді.