TikTok-тың иесі Қытайдағы ең бай адам атанды

ByteDance-тың негізін қалаушы Чжан Имин Қытайдың ең бай адамы атанды. TikTok табысының өсуі мен шай төңірегіндегі жанжалдар оған бірінші орынға шығуға көмектесті, деп хабарлады kursiv.media.

41 жастағы Чжан Имин жеке капиталы 49,3 млрд долларға жетіп, соңғы 3 жыл бойы тізімнің басында тұрған Nongfu Spring компаниясының басшысы Чжун Шаньшаньнан басып озды. «Бөтелкедегі су патшасының» байлығы 24%-ға төмендеп, 47,9 млрд долларға тең болды. Бұл – шай қаптамасындағы жапондық ғибадатхана бейнесіне наразылық танытқан патриот қытайлықтар жариялаған бойкоттың салдары.

ByteDance компаниясына тиесілі TikTok әлеуметтік желісі ай сайын бүкіл әлем бойынша миллиардтан аса белсенді пайдаланушыға ие болып отыр. CNBC мәліметінше, Hurun зерттеуіне сәйкес, компанияның табысы былтыр шамамен 30%-ға өскен. Былтыр Чжан Имин рейтингте бесінші орынды иеленген еді.

Tencent (WeChat мессенджеріне иелік етеді) басшысы Пони Ма бір орынға төмендеп, үшінші орынды иеленді. Интернет-гигант табысының өсуі нәтижесінде оның байлығы 13%-ға артып, 44,4 млрд долларға жетті.

Төртінші орынды Pinduoduo интернет-дүкенінің негізін қалаушы иеленді. Оның байлығы 9%-ға қысқарған.

Үй техникасы бренді – Midea-ның негізін қалаушы Хэ Сянцзянь мен электр көліктеріне арналған батарея өндіретін CATL басшысы Цзэн Юйцюнь тізімде тиісінше бесінші және алтыншы орындарды қанағат тұтты.

Hurun Research деректері бойынша, Қытайда 5 млрд юаньнан (700 млн доллардан) аса байлығы бар 1 094 адам бар. Бұл – былтырғымен салыстырғанда 147 адамға аз. Олардың жалпы байлығы 3 трлн долларға жетіп, былтырғыдан 10%-ға азайған.

Долларлық миллиардерлер саны 2023 жылмен салыстырғанда, 142 адамға азайып, 753-ке жетті.

Биыл Қытайдың ең бай адамдары тізімінде 54 жаңа есім пайда болды. Бұл – кейінгі 20 жылдағы ең төмен көрсеткіш.