Қазақстандық блогерлер соңғы 9 айда 1,2 млрд теңге салық төлеген
br.pinterest.com 
Жылдық табысы 1 020 000 теңгеден асса, салық төлеуге міндетті
Елімізде ресми тіркелген 745 блогер соңғы 9 айда мемлекетке 1,2 миллиард теңгеден аса салық төлеген. Олардың салығы туралы есепті Мемлекеттік кірістер комитеті жариялады.
«Онлайн-платформалар және онлайн-жарнама туралы» заңның нормаларына сәйкес, блогер – онлайн-платформада ақпаратты басқа тұлғаларға іскерлік мақсатта жариялайтын онлайн-платформаның пайдаланушысы. Бүгінде республикада 745 блогер бар. Тізім Instagram, Youtube, TikTok-та 20 мыңнан аса жазылушысы бар жеке тұлғалардан құралған. Салық кодексіне сәйкес, блогерлердің, оның ішінде ақпараттық өнімдерді жарнамалаудан немесе ілгерілетуден түскен табыстарына салық салынады, – делінген хабарламада.
Ведомствоның мәліметінше, блогер жалдамалы жұмыс күшін пайдаланса немесе жылдық табысы 12 ең төменгі жалақы мөлшерінен асса, жеке кәсіпкер ретінде тіркелуі керек. 1 қаңтардан бастап ең төменгі жалақы – 85 мың теңге, Яғни блогердің жылдық табысы 1 020 000 теңгеден асса, салық төлеуге міндетті.
Блогерлердің көпшілігі қазірдің өзінде кәсіпкер саналады және қолданыстағы салық режиміне байланысты тиісті салықтарды төлейді. Осылайша, өткен 9 айда олар 1 миллиард 226 миллион теңгеден аса салық төлеген, – деп хабарлады комитет.
