Билік шаруалардың егіндегі ескі-құсқы техникасын жаңартып алуына қарыз береді
Бірақ утилизациялық алымды алып тастауды қарастырып жатқан жоқ
Сенат депутаты Әли Бектаев Үкіметке ауыл шаруашылығы техникасына утилизациялық алымды алып тастауды ұсынды.
Оның айтуынша, қазір елімізде ауыл шаруашылығының құрал-жабдықтарын өндіретін 10 зауыт, өздігінен жүретін техниканы шығаратын 8 кәсіпорын бар.
Осылайша, ауыл шаруашылығы техникасын тауар өндірушілер сатып ала алмайды. Керекті жеңіл құрылғылардың, соқалар мен культиваторлардың, дискілі тырмалардың, мал азығын дайындайтын машиналар мен механизмдердің, пішен жинағыштар мен тұқым сепкіштердің, көшет отырғызатын жабдықтардың басым бөлігі шетелден әкелінеді.
Сондай-ақ ол жаңа ауыл шаруашылығы техникасына утилизациялық алымның құны жоғары екенін атап өтті. Соның салдарынан шаруалар әбден тозған тракторлар мен комбайндарды жөндеп, пайдалануға мәжбүр.
Осы орайда сенатор ауыл шаруашылығы техникасына утилизациялық алымды алып тастауды ұсынды.
Ал Өнеркәсіп және құрылыс министрі Қанат Шарлапаев одан кейін журналистерге берген жауабында утилизация алымы жойылмайтынын мәлімдеді.
Ал ауыл шаруашылығы техникасын жаңартуға 450 млрд теңге бөлінеді. Бұл туралы Өнеркәсіп және құрылыс емес, Ауыл шаруашылығы министрі Айдарбек Сапаров айтты. Оның пікірінше, мәселені шешу үшін шаруаларды қолжетімді несиемен дер кезінде қамтамасыз ету керек. Сондықтан биыл салаға бюджет қаражатынан басқа да көздер, соның ішінде екінші деңгейлі банктердің капиталы да тартылған. Енді көктемгі егіс және күзгі егін жинау жұмыстарын жеңілдетілген несиемен толық қамту үшін жыл сайын 1,5 триллион теңге, ауыл шаруашылығы техникасын жаңарту тапсырмасын 8-10% деңгейінде орындау мақсатында жеңілдікті лизингке 450 млрд теңге бөлінеді.
Қазір қаржыландыру көздері пысықталып жатыр. Бірақ, «Тегін ірімшік қақпанда ғана бар» дегендей, бұл қаражаттың бәрі қайтарылуы қажет.