Елімізде шошқаның субсидиясы жылқынікінен 40 есе көп
Биыл қыста жем-шөп таусылып, жылқылар мұз құрсанған далада арам өлді
Мәжілістегі «Ақ жол» фракциясының депутаттары Қазақстанда шошқа өсіруге бөлінген қаржы (2,1 млрд теңге) жылқы өсіруге бөлінген қаржыдан (53 млн теңге) 40 есе көп екенін айтып, дабыл қақты.
Депутат Қазыбек Иса биылғы қалың қар, қатты қыстың мал шаруашылығына оңай тимегенін еске салды. Әсіресе, Арқа мен солтүстік өңірлерде жем-шөп таусылып, далада қардың беті жаппай мұз құрсанып, жылқылардың тебіндей алмай, арам өлгені рас.
Оның айтуынша, Ақмола облысының Зеренді ауданындағы Ақадыр, Васильков, Заречный, Шағалалы сияқты ондаған ауылда жұрт жем-шөп таппай, әбден қиналған. Ақкөл ауданында да шөптің бағасы тым шарықтап кетіп, бір орамы 20 мың теңгеге дейін жетті.
Сол себепті ол Үкіметке шұғыл түрде кешенді шараларды қабылдауды ұсынды.
Оның айтуынша, былтыр республикалық бюджеттен жылқы өсіруге бар болғаны 52,9 млн теңге, ал шошқа өсіруге 2,1 млрд теңге бөлінген. Шошқаның субсидиясы – жылқынікінен 40 есе көп. Біздің биліктің шошқаны экспорт үшін «алақанда аялап отырғаны» болмаса, оның етін ел ішіндегі халықтың басым бөлігінің жемейтіні тағы белгілі.