Алматыда жұмыссыз қалған саудагерлер бас көтерді
Саудагерлерді алалап, өз адамдарын қойып жатыр, - дейді
«Базар басшылығы берекемізді алды» деп базынасын айтып жиналғандар 8 жыл тер төккен сауда орнынан бір күнде айырылған. Ал базар басшылығы заң шеңберінен шықпағанын айтып, ақталып отыр, деп хабарлады Almaty.tv.
Телеарна мәліметінше, саудагерлер нәпақа тауып отырған сауда орындарынан аяқасты айырылып қалған. Олардың айтуынша, базар бастығы босатыңдар деп пәрмен бергенмен, нақты себебін түсіндірмеген.
Шағым айтушылар «саудагерлерді алалап, өз адамдарын қойып жатыр» дейді. Альмира Әлиева да осы базардан жұмыс бастап, нан өнімдерін өңдеп сатқан. Ол орынды сатып алып, кейін ай сайын жалға алу ақысын төлеп отырған.
Ал базар басшылығы «заң шеңберінен шықпадық» деп ақталды. Олардың айтуынша, базар мен саудагердің арасындағы келісімшартты бұзуға негіз бар. Сондықтан сауда орындарын реттеп жатқанын жеткізді.
Алайда шағымданушылар онымен тынбай, сотқа да арыз жазбақ. Жетісу облысы әкімдігінің кәсіпкерлік бөлімі мен прокуратурасына да хат жолдайтындарын ескертті.