Биыл мемлекеттік грантты қай кәсіпкерлердің ала алатыны түсіндірілді

Үкіметтің 2024 жылғы 17 қыркүйектегі «Жеке кәсіпкерлікті мемлекеттік қолдаудың кейбір шаралары туралы» қаулысы қабылданды. Атап айтқанда, әлеуметтік кәсіпкерлік субъектілері үшін мемлекеттік гранттар беру қағидалары бекітілді.

Мемлекеттік гранттар «Бір ауыл – бір өнім» бағдарламасының финалистері саналатын әлеуметтік кәсіпкерлік, шағын және орта кәсіпкерлік субъектілеріне ғана өтеусіз негізде беріледі.

Мемлекеттік гранттарды мемлекет кәсіпкерлердің өтінімдерін іріктеу бойынша өткізілетін конкурстардың қорытындылары бойынша өңірлік үйлестірушілер арқылы береді. Бұл ретте қолдау шараларын қаржыландыру жергілікті бюджет қаражаты есебінен іске асады.

Субсидиялаудың ақпараттық жүйесін пайдалану жөніндегі талаптар өңірлік үйлестіруші/кәсіпкерлік жөніндегі уәкілетті орган мен көрсетілетін қызметтерді жеткізуші арасында тиісті шарт жасасқаннан кейін туындаған қарым-қатынастарға қолданылады.

Мемлекеттік гранттар берудің осы қағидалары күшіне енген күні қолданыста болатын және субсидиялаудың ақпараттық жүйесінде тіркелген грант беру туралы шарттардың қаржыландыруға жататыны көрсетіледі.

Қаржы агенттігінің және қызметтерді жеткізушінің қызметтерін өңірлік үйлестіруші/кәсіпкерлік жөніндегі уәкілетті орган республикалық/жергілікті бюджет қаражаты есебінен төлейді.

Грантты қалай алуға болады?

Осы Қағидалардың шарттарына сәйкес келетін әрбір кәсіпкер бір бизнес-жоба бойынша бизнес-идеяларды іске асыру үшін мемлекеттік гранттар беру мақсатында конкурстық іріктеуге қатысушы бола отырып, грант ала алады.

Бұл ретте кәсіпкердің бизнес-жобасы тізілімде тіркелген әлеуметтік кәсіпкерлік субъектісінің қызмет саласына сәйкес келуге тиіс.

Бизнес-идеяларды іске асыру үшін бизнес-жобаның міндетті шарттары:

• кәсіпкердің оны іске асыруға берілетін мемлекеттік грант көлемінің кемінде 20% мөлшерінде, оның ішінде бизнес-жобаға қатысатын жеке жылжымалы немесе жылжымайтын мүлікпен шығыстарды ақшалай қаражатпен қоса қаржыландыруы;
• жаңа жұмыс орындарын құру;
• кәсіпкердің бизнес-жобасында инфрақұрылымның болуы немесе жобаны іске асыру үшін жеткілікті инфрақұрылым құру көзделген инвестициялық жоспардың болуы.

Бір кәсіпкер үшін мемлекеттік грант оны алуға ұсынылған өтінімге байланысты, 5 млн теңгеге дейінгі соманы қамтиды.

Кәсіпкерлер мемлекеттік грантты мына мақсаттарға пайдалана алады:

• негізгі құралдарды (оның ішінде негізгі құралдарды салу/ жаңғырту/реконструкциялау/күрделі жөндеу), тауарларды шығару немесе қызметтер көрсету үшін қажетті шикізат пен материалдарды сатып алу;
• материалдық емес активтерді сатып алу;
• технологияларды сатып алу;
• кешенді кәсіпкерлік лицензияға (франчайзингке) құқықты сатып алу;
• зерттеу жұмыстарына немесе жаңа технологияларды енгізуге байланысты шығындар.

Мемлекеттік грант қаражатын өзге мақсаттарға пайдалануға жол берілмейді.

Кәсіпкердің бизнес-жобаны іске асыру мерзімі грант беру туралы шартқа қол қойылған сәттен бастап, 18 айдан аспауға тиіс.

Бұл ретте, егер іске асырудың көрсетілген мерзімі ішінде кәсіпкер қызметін іске асырмаса, сатып алынған негізгі құрал іске асырылса және бизнес-жобаны іске асыру және одан әрі іске асыру үшін ұқсас/баламалы құралмен ауыстырылмаса, кәсіпкер мемлекеттік грант қаражатын толық көлемде өтеуге міндетті.

Қаулы биыл 4 қазаннан бастап қолданысқа енгізіледі.