Америкадағы қазақ кәсіпкер өз бизнесін 200 млн долларға сатқан

Қазақ кәсіпкер Қанат Бектеміров Америкада бизнесін 200 миллион долларға сатты, деп хабарлады madeniportal.kz.

Бастапқыда америкалық ірі компанияның басшылығы оны стратегиялық мәселелер жөніндегі бас директор лауазымына тағайындаған. 3 жыл бұрын ол техникалық бөлімнің бас директоры қызметіне тұрды. Компанияның басшысы, негізін қалаушы, қаржы директорынан кейінгі төртінші тұлға саналады екен. Қазір оның қоластында 40-қа жуық маман жұмыс істейді. Олар бірнеше өнімімен нарыққа шығып үлгерген.

Қанат өз стартапын іске қоспас бұрын жергілікті нарықты зерделеп, егжей-тегжейіне қаныққан. Оның айтуынша, Америкада тауарлардың бөлшек саудасын supply chain (жеткізілімдер тізбегі) аталатын алпауыт супермаркеттер және ритейлерлер (бөлшек саудагерлер) іске асырады.

SupplyPike супер-гипермаркеттердің шет-шегі жоқ қаптаған ережелер жинағымен байланысты құжаттамаларды бір жерден реттеуге көмектесетін бағдарламалық қамтылым ұсынды. Оны Coca-Cola да пайдаланатын көрінеді.

Пысық, сөзге шешен Қанат Бектеміров банкирлермен, инвесторлармен келіссөздер жүргізудің шеберіне айналды. Ол өз бөлімінің капиталын 40 миллион долларға дейін ұлғайта алыпты.

Оның компаниясының негізгі клиенттері – өндірістік компаниялар. Өндірушілер өз өнімдерін Amazon, Walmart сияқты ірі желілерге өткізеді. Сондай-ақ компания бухгалтерлік қызметтер де көрсетеді. Мысалы, Қанаттың фирмасы Amazon-дардың қандай қоймаларында өз клиенттерінің қанша тауары қалғанын, сұраныс қаншалықты зор екенін шынайы уақыт режимінде есептеп, көрсетіп отырады екен.

Орталық Азия нарығына шығу жоспарларында жоқ көрінеді. Өйткені бұл нарықтың шағын саналатыны, ондаған миллиард доллармен есептелетіні мәлім. Қанаттың айтуынша, Батыстың нарықтарына жеткізу тізбегі 5-6 триллион долларға бағаланады.

Енді ол IT маманы ретінде жасанды интеллектпен айналысуды да жоспарлап отыр. Келесі стартапы сонымен байланысты болуы мүмкін.