Ақтауда үйінің кіреберісін ұлттық нақышта безендірген тұрғын тапсырысқа қарық болды
Ол мектепте өз қолымен этноауыл жасаған
Ақтауда 28-шағын аудандағы 16-үйдің тұрғыны Мейрамгүл Тұңғатарова көпқабатты үйдің екі қабатының қабырғасына киіз үйдің керегесін, құрақ көрпелер жиналған сандық пен көне жәдігерлерді салып, көпшілікке танылды. Содан бері тұрғындардан тапсырыс көбейген. Ұлттық нақышта балабақшалардың қабырғаларын безендіруге де сұраныстар түскен, деп хабарлады kazinform.
Айта кетсек, Мейрамгүл – Ақтау қаласындағы №20 Мұхтар Әуезов атындағы жалпы білім беретін мектептің көркем еңбек пәнінің мұғалімі. Ол мектепте өз қолымен этноауыл жасаған.
Осы орайда көрші-көлемге, барша ақтаулықтарға үлгі болып, ел бойынша жүріп жатқан «Таза Қазақстан» тазалық шарасына атсалысқан тұрғынға қала әкімінің алғысы жарияланды.