Қазақстанда жұмыртқаны терең өңдейтін алғашқы зауыт салынады

Вице-премьер Серік Жұманғарин «Курочка ряба» брендімен өнім шығаратын CAPITAL projects LTD ЖШС-ның қуаты жылына 20 мың тонна тауық етін өндіретін фабрикасы орналасқан Ақмол ауылында болды. Мемлекеттік қолдаудың көмегімен жақын арада өндіріс қуатын 30 мың тоннаға дейін арттыру жоспарланып отыр.

Кәсіпорын тауық еті мен жұмыртқа өндірісінің толық циклін құрған «Шаңырақ» компаниялар тобына кіреді: аналық мал – инкубациялық жұмыртқа – инкубатор – репродуктор – тауық еті және жұмыртқа – тарату.

Сонымен қатар жем өндіру және экспорттау үшін ауылшаруашылығы дақылдарын өсіреді. Кәсіпорын ең аз қалдықпен жұмыс істейді, тіпті тауық көңі де дақыл өсіруге пайдалану үшін органикалық тыңайтқыштарға өңделеді.

Қазір майлы дақылдарды қайта өңдеу желісі салынып жатыр, бұл өз жемшөп өндірісін 25%-ға арзандатуға мүмкіндік береді. Оның өзі тауық жұмыртқасы мен құс етінің бағасына оң әсер етеді. Өйткені жем осы өнімдердің өзіндік құнының негізгі және ең қымбат құрамдас бөлігі саналады.

Кәсіпорын тәулігіне 1 млн пастерленген сұйық және құрғақ жұмыртқа өнімдерін шығарумен айналысады. Бұл тауық жұмыртқасын терең өңдейтін еліміздегі алғашқы зауыт болмақ.

Кәсіпорын қазірдің өзінде технологиясы Қазақстанда белгіленетін, жұмыртқа өнімдерін өндіру бойынша әлемдік көшбасшы Тhornico (Sanovo) компаниясымен эксклюзивті келісімге қол қойған. Бұл жобаны келесі жылы жеңілдетілген несиелеу түрінде мемлекеттің қолдауымен іске асыру жоспарланып отыр.

Вице-премьер аталған жобаны қолдап, оның еліміздегі АӨК саласында терең қайта өңдеуді дамыту қажеттігін атап өтті.

Кәсіпорында ылғал астықты сақтаудың жаңа әрі қолжетімді әдістері де қолданылады. Онда 8 жылдан бері ылғалдығы 18-20% болатын астықты сақтауға арналған пластик қапшықтар бар. Бұл пішінде оны 6 ай бойы қауіпсіз етіп, көктемде ашып, кептіріп, әрі қарай сақтауға болады.

Кәсіпорын басшысы Максим Божконың айтуынша, оттегінің болмауына байланысты астық жыл бойына өте жақсы сақталады.