Депутат ауыл жастарының қалада мардымсыз жалақы алып жүргеніне алаңдаулы
Бұл оларды қарызға итермелеп, әлеуметтік тұрақтылыққа кері әсер етуі мүмкін
Мәжіліс депутаты Жигули Дайрабаев NEET жастарының мәселесін көтеріп, оларға тегін білім беру маңызды екенін айтты.
Осы орайда ол президент тарапынан 2029 жылға қарай NEET санатындағы жастардың үлесін 3%, яғни 2 есе төмендетуге тапсырма берілгенін де еске салды.
Оның пікірінше, «Жол тап» жобасының алгоритмі өз тиімділігін көрсетіп отыр.
Сондықтан ол премьер-министр Олжас Бектеновтен қалаларға келген ауыл жастарын жұмыспен қамтуды ынталандыру үшін қабылданған Үкімет шешіміне тағы да қосымша серпін беруді сұрады.
Ал биыл наурыз-сәуір аралығында 20-ға жуық өңірде Zhas Project жобасына қатысуға өтінім қабылданғанған еді. Мәдениет және ақпарат министрлігінің мәліметінше, жобаға 18-34 жас аралығындағы NEET санатындағы (уақытша жұмыспен қамтылмаған) жастар қатысқан.
Жоба жеңімпаздарының әрқайсысына әлеуметтік бастамаларды іске асыру үшін 1 миллион теңгеге дейін шағын гранттар бөлінеді. Осылайша, мемлекет болашақта 280 жобаны іске асырмақ.
Жоба, бағдарламалардың болғаны дұрыс-ақ, бірақ бұл ретте Мәжіліс депутаты қаладағы ауыр жұмыс астындағы жастардың жалақысы мардымсыз деп отыр. Шағын грантпен жұрттың бәрінің жеке бизнес бастап кетуі мүмкін болса, Дайрабаев айтқан құрылыс алаңдары мен базарлар қаңырап бос қалар еді ғой? Демек, Үкімет өкілдеріне цемент езгізіп, тәшкі итертіп көрмесе, мәселеге онша мән бере алмайтынға ұқсайды.