Бір жобаға – 88 млн теңге: «Қазақфильм» қызметкерлері бір жыл бойы жалақы алмаған
Мұнда түрменің режимі орнады, - дейді анимация бөлімінің редакторы Ерлан Төлеутай
«Қазақфильм» АҚ қызметкерлері киностудия алдына жиналып, басшылықтың шығуын талап етті. Анимация бөлімінің мамандары бір жыл бойы жалақы алмағанын айтып, шағымданған, деп хабарлады КТК телеарнасы.
Киностудия аниматорлары соңғы жылдары «Алтын адам» атты толық метрлі анимациялық фильммен жұмыс істеген. Мамандар жұмысты орындап, тапсырған. Алайда ол үшін еңбекақысын әлі де алмаған.
«Алтын адам» атты толық метрлі мульт жобасы былтыр толық аяқталған. Бірақ мемлекеттен бөлінген тиісті қаражат әлі күнге дейін қызметкерлерге берілмеген. Еңбекақысын күте-күте қарызға батқан өнер адамдары бұл былықты басшылықтың ұйымдастырып отырғанын жеткізді.
«Қазақфильм» президенті Азамат Сатыбалды ашуға булыққан қызметкерлерімен кездесуге шықпаған. Мәселенің мән-жайын айтуға оның орнына орынбасары Айдар Омаров барған. Ол «Алтын адам» жобасы бойынша 88 миллион теңге қарызы бар екенін растап отыр.