Назарбаевтың қарындасы «Кенжехан» базарына иелік етіп келген
Оның жанындағы адамдар базардағы әр сауда орнын 10 мың долларға сатқан
Экс-президент Нұрсұлтан Назарбаевтың қарындасы – Әнипа Назарбаеваның айналасындағы адамдар Алматыда орналасқан «Барахолка» базарындағы әр сауда орнын 10 мың долларға сатқан. Бұл туралы Мәжіліс депутаты Нартай Сәрсенғалиев айтты.
Оның айтуынша, кейін базардың жаңа қожайыны саудагерлерге «контейнерді 325 мың теңгеден сатып алыңдар» деген талап қойған. Осылайша, халық бір орынға 2 рет ақша төлеген.
Осы орайда ол алматылық саудагерлердің 3 талабын жеткізді:
- Бір контейнерге 2 рет ақша төлеген жұрт бұрынғы немесе бүгінгі базар иесінен ақшасын қайтарып беруді талап етіп отыр. Бір сауда орнына 2 рет ақша төлеу ақылға сыймайды;
- Ай сайын қосымша қаржы жинау мен жұмыс орындарын мөрлеп, жауып тастауға қатысты әрекеттердің заңдылығын тексеріп, шара қолданылсын;
- «Кенжехан» базарын Алматыдағы мемлекеттік кірістер департаменті тексерген. Соның нәтижесін Қаржы министрлігіне ұсынсын.
Депутаттың дерегінше, Қазақстанда жыл басында 722 базар тіркелген. Ал сол базарлардың бәрінде заң үстемдігі толық сақталып отырғанына күмән бар.
Одан кейін журналистер Сауда және интеграция министрі Арман Шаққалиевтен Әнипа Назарбаева иелік еткен «Кенжехан» базарындағы тексерулер туралы сұрады.
Сондай-ақ ол мұндай мәселеде кәсіпкерлердің барлық тәуекелді түсініп, заң тұрғысынан сауатты болуы керектігін айтты.
Алайда ол «Әнипа Назарбаева әлі күнге дейін «Кенжехан» базарының қожайындарының бірі ме?» деген сұраққа жауап бере алмады. Айтуынша, ол жөнінде тек Әділет министрлігіне сұрау жолдауға болады.