ҚМА адал кәсіпкерлерге тиіспей, «көлеңкелі» экономикаға тосқауыл қоя бермек

Қаржылық мониторинг агенттігінің төрағасы Дмитрий Малахов президент Қасым-Жомарт Тоқаевқа ведомствоның былтыр атқарған жұмысының қорытындысы мен алдағы кезеңге арналған жоспарын баяндады.

Оның айтуынша, қылмыстық жолмен түскен кірістерді жылыстатуға қарсы күрес саласында:

• 5,7 мыңнан аса тұтынушымен іскерлік қарым-қатынас тоқтатылған;
• криптовалюта айырбастайтын 1,5 мыңнан аса заңсыз онлайн-сервис бұғатталған;
• 49 заңсыз майнер әшкереленген.

Қазір оларға қатысты тексеріс жұмыстары жүргізіліп жатыр. Террористік және экстремистік ұйымдардың шоттарына қаржы аударуға қатысты 1,2 мың әрекет анықталып, оларға шектеу қойылды.

Мемлекет басшысына 41 қаржы пирамидасының жойылғаны, зардап шеккендерге 4,6 миллиард теңге қайтарылғаны жөнінде мәлімет берілді. Алаяқтық белгілері бар 8 мыңнан астам сайт пен аккаунт бұғатталып, 4,8 мың онлайн-казино сайтының қызметі тоқтатылған. Екінші деңгейлі банктермен және қаржы реттеушілерімен бірлесіп, 21 жасқа толмаған азаматтардың букмекерлік кеңселерге төлем жасау мүмкіндігін автоматты түрде шектеу тетігі енгізіліп жатыр.

Бұдан бөлек, президентке 74 миллиард теңге көлемінде негізсіз бюджет шығындарының алдын алғаны, заңсыз қолма-қол ақшамен айналысатын 59 «көлеңкелі» алаң қызметінің тоқтатылғаны, 7 ұйымдасқан қылмыстық топтың жойылғаны, сотқа дейінгі тергеу амалдарының аясында 141 миллиард теңге көлемінде келтірілген залалдың өтелгені жөнінде есеп берілді. Сондай-ақ капиталды заңсыз шығаруға қарсы іс-қимыл саласында жалпы сомасы 276 миллиард теңгені қамтитын активтер қайтарылған.

Қаржылық мониторинг агенттігі алдағы уақытта заңсыз шығарылған активтерді қайтару және адал кәсіпкерлердің ісіне араласпай, «көлеңкелі» экономикадағы қылмыстардың жолын кесу жұмыстарына баса мән береді. Сонымен қатар Қаржылық мониторингті дамыту тұжырымдамасын және Көлеңкелі экономикаға қарсы іс-қимыл жөніндегі кешенді жоспарды іске асыру, жылыстату жүйесін FATF (ақшаны жылыстатуға қарсы күрестің қаржылық шараларын әзірлеу тобы) халықаралық стандарттарына толық сәйкестендіру үшін шаралар қабылданады.

Қасым-Жомарт Тоқаев адал бизнесті қорғау шараларын күшейту қажет екенін ерекше атап өтіп, агенттік қызметінің негізгі бағыттары бойынша жұмыстарды жалғастыруды тапсырды.