Агенттік төрағасы депутаттардың микронесиені қолданыстан алып тастау талабын құптады
Проблемалық несиелер бойынша жалпы қарыз 1,7 трлн теңгеден асады
Проблемалық несие санын азайту үшін қазақстандықтарға микронесие бермеу мәселесі қарастырылып жатыр. Бұл туралы Қаржы нарығын реттеу және дамыту агенттігінің төрағасы Мәдина Әбілқасымова айтты.
Бұл ретте Мәжіліс депутаты Ержан Бейсенбаев қазақстандықтардың дені жалақыға дейін микронесие алуды әдетке айналдырғанын алға тартқан болатын.
Оның әріптесі Үнзила Шапақтың айтуынша, жалақыға дейінгі микронесие 45 күнге 50 АЕК (184 600 теңге) сомасында беріледі. Микроқаржылық ұйымдар жоғары ставка бойынша тұрғындарға қарызды бере береді. Сондықтан бұл мәселе де несие туралы жаңа заң аясында қаралған.
Ал Қаржы нарығын реттеу және дамыту агенттігінің төрағасы Мәдина Әбілқасымова соңғы 2 жылда қысқа мерзімді онлайн несие алушылардың қатары күрт өскенін айтты.
Ол да адамдардың құқығын қорғау үшін қысқа мерзімге берілетін несиелердің ерекше түрін алып тастау керек деп санайды. Депутаттардың бастамасын қолдап отыр.
Тақырыпқа – тұздық
Жалпы, биыл 1 қаңтардағы жағдай бойынша 8,5 миллион қазақстандық қаржы ұйымдарына 19 трлн теңге қарыз. Оның ішінде 8,2 миллион адамның кепілсіз тұтынушылық несиесі бойынша берешегі – 10 трлн теңге. 1,6 млн адамның 1,7 трлн теңгеге проблемалық несиесі бар. Олар қарызын төлеу мерзімін 90 күннен кешіктірген.