Нейзи атты тазымның басынан Франция президенті сипаған - Абзал Досыман
Қасым-Жомарт Тоқаевтың қолындағы Ронни атты тазыны да осы жігіт сыйға тартқан
Ежелден саятшылық құрған қазақтың сенімді серігі – тазының қадірі артып, қатары көбейіп келеді. Қазір асыл өнеріміз ұлықталып, тазыны әлем тани бастады.
Жалпы, қазақы тазының жарғақ және шашақ құлақты деген екі түрі бар. Соның шашаққұлақтыларын көбейтіп жатқан саятшының бірі – Nomad ұлттық аңшылық клубының жетекшісі Абзал Досыман.
Еске сала кетсек, елордадағы көрмеде Франция мен Түркия президенттерін тәнті еткен ит осы Абзал Досыманның 4 қар басқан Нейзи атты тазысы болатын.
Мысалы, қазір президент Қасым-Жомарт Тоқаевтың да 3 тазысы бар. Кішісі Наурыз 1-ден асса, үлкені Нэнси 5 қар басқан. Ал үшінші Ронни атты тазысы – 4 жаста. Дәл осы Ронниді президентке Абзал Досыман сыйға тартқан. Қазір ол өзінің оншақты тазысын күзде V Дүниежүзілік көшпенділер ойындары қарсаңында өтетін көремеге дайындап отыр.
Иә, Абзалдың тазылары көрмелерде көпшілікті тазалығымен әрі сымбатымен таңғалдырып келеді. Алайда ол сұлулыққа емес, жылдамдыққа назар аудару керектігін айтады.
Айтуынша, олардың бұл дайындығымен арнайы ит баптаушылар айналысады.
Соңғы жылдары тазы тұқымы көбейіп келеді. Оған елде өтетін шырға тарту жарыстары, сәндікке арналған көрмелер себеп. Тазы жанашыры Абзал Досыман қазақы итті әлемдік деңгейде барынша танытқысы келеді. Осы жолда еңбектеніп те жүр. Тазыларға қазірдің өзінде АҚШ, Канада, Түркия сияқты алпауыт елдерден сұраныс бар.